নাটক · শ্ৰীলংকা
Black, White & Colors
Inter Act Art Institute
বৃহস্পতিবাৰ, ২৯ অক্টোবৰ ২০২৬ · সন্ধিয়া ৫:৩০
শ্ৰীশ্ৰী মাধৱদেৱ আন্তঃৰাষ্ট্ৰীয় প্ৰেক্ষাগৃহ, গুৱাহাটী
শনিবাৰ, ৩১ অক্টোবৰ ২০২৬ · সন্ধিয়া ৬:৩০
মাকুম, তিনিচুকীয়া
সময়সীমা
৫২ মিনিট
ভাষা
ইংৰাজী
কলা-কুশলী
নাট্যকাৰ, পৰিকল্পনা আৰু পৰিচালনা
Sujeewa Pathinisekara
পৰিকল্পক
M.G. Mohamed Safeer
দলৰ বিষয়ে
১৯৯২ চনত প্ৰতিষ্ঠিত Inter Act Art Institute (IAA) শ্ৰীলংকাত নাট্য আৰু পৰিৱেশ্য কলাৰ বিকাশত নিয়োজিত এক বহুজনগোষ্ঠীয়, বহুভাষিক আৰু বহুধৰ্মীয় অনুষ্ঠান। সিংহলী আৰু তামিল ভাষাত ফ’ৰাম থিয়েটাৰ, লগতে ব্লেক বক্স থিয়েটাৰ আৰু আধুনিক একক নাটকৰ চৰ্চা প্ৰৱৰ্তন কৰাত IAA অগ্ৰণী। অনুষ্ঠানটোৱে যুৱ সৃষ্টিশীল শিল্পী, স্নাতক শ্ৰেণীৰ ছাত্ৰ-ছাত্ৰী আৰু কৰ্প’ৰেট খণ্ডৰ অংশগ্ৰহণকাৰীসকলক সমসাময়িক পৰিৱেশন-কৌশলৰ প্ৰশিক্ষণ দিয়ে। Sri Jayawardenepuraত অৱস্থিত IAAৰ অধীনত আছে এখন মিনি থিয়েটাৰ, এটা নাট্য অকাডেমী, এটা প্ৰশিক্ষণ কেন্দ্ৰ, এটা নৃত্য শাখা, এটা নাট্য প্ৰযোজনা গোট, এটা চলচ্চিত্ৰ আৰু টেলিভিছন প্ৰযোজনা গোট, আৰু এটা প্ৰকাশন শাখা। কলম্বো আন্তঃৰাষ্ট্ৰীয় নাট-মহোৎসৱকে ধৰি অনুষ্ঠানটোৱে ৰাষ্ট্ৰীয় আৰু আন্তঃৰাষ্ট্ৰীয় নাট-মহোৎসৱো আয়োজন কৰে।
নাটকৰ বিষয়ে
‘Black, White & Colors’ৰ কাহিনী এগৰাকী যুৱতীক লৈ, যিয়ে অসন্মান আৰু সামাজিক অসমতাৰে ভৰা এখন সমাজত নিজকে প্ৰতিষ্ঠা কৰিবলৈ চেষ্টা কৰে। ৰঙীন কাপোৰ পিন্ধাৰ বাবে বগা বস্ত্ৰধাৰী সামাজিক জগতখনে তাইক প্ৰত্যাখ্যান কৰে; একঘৰীয়া অৱস্থাৰ মাজেৰে যুঁজ দি অৱশেষত তাই নৃত্যৰ জগতত কাম পায়। কৰ্মজীৱন আগবঢ়াৰ লগে লগে তাই কোম্পানীৰ মালিকজনৰ সৈতে এক জটিল সম্পৰ্কত জড়িত হৈ পৰে আৰু সহকৰ্মীসকলৰ বৈৰী মনোভাৱৰ সন্মুখীন হয়। সফলতা, মুক্তি আৰু স্বীকৃতিৰ প্ৰতি তাইৰ আকাংক্ষা নৃত্য আৰু সপোনৰ চিত্ৰকল্পৰ মাজেৰে প্ৰকাশ পায়। অৱশেষত তাই এখন বিশ্বস্তৰৰ নৃত্য প্ৰতিযোগিতাত জয়ী হয়, কিন্তু ব্যক্তিগত ক্ষতিৰ ছাঁয়ে তাইৰ বিজয়ক ম্লান কৰি পেলায়। মঞ্চত তাই অকলে ৰৈ যায়; লগত থাকে কেৱল এটা মুকুট, ভাৰাক্ৰান্ত হৃদয় আৰু বিশাল জনসমাগমৰ দৃষ্টি।
পৰিচালকৰ টোকা
বৰ্ণগত আৰু সামাজিক বৈষম্যৰ বিষয়ে কৰা চিন্তা-চৰ্চাৰ পৰাই এই প্ৰযোজনাৰ জন্ম; ইয়াৰ ভিতৰত আছে ‘Gandhi’ চলচ্চিত্ৰৰ “কেৱল শ্বেতাংগৰ বাবে” ৰেলগাড়ীৰ দৃশ্য আৰু আমেৰিকাৰ নাগৰিক অধিকাৰ কৰ্মী ৰোজা পাৰ্কছৰ জীৱন। এই প্ৰসংগবোৰে বৰ্ণ, জনগোষ্ঠী, ধৰ্ম আৰু সামাজিক পৰিচয়ৰ ভিত্তিত মানুহৰ প্ৰতি কৰা অসমান ব্যৱহাৰৰ ফালে মনোযোগ আকৰ্ষণ কৰিছিল; শ্ৰীলংকাকে ধৰি বহু সমাজতে এই অৱস্থা দেখা যায়। সামাজিক অভিজ্ঞতা আৰু ইণ্টাৰনেট তথা সামাজিক মাধ্যমত প্ৰচাৰিত প্ৰবন্ধৰ অধ্যয়নৰ পৰা নাট্যকৰ্মটোৱে উপাদান আহৰণ কৰিছে, আৰু এই উদ্বেগবোৰক অসমতা, বৰ্জন আৰু সমান মানুহৰ মৰ্যাদা পাবলৈ চলি থকা সংগ্ৰামক লৈ ৰচিত এক পৰিৱেশনলৈ ৰূপান্তৰিত কৰিছে।
ডেলিগেট পাছ · প্ৰতিদিনে ₹১০০
সন্ধিয়াৰ পৰিৱেশনসমূহত প্ৰৱেশৰ বাবে ডেলিগেট পাছ লাগিব। এদিনৰ বাবে প্ৰতিখন পাছৰ মূল্য ₹১০০; অনুষ্ঠানস্থলীৰ কাউণ্টাৰত পাছ পোৱা যাব।
